TIA YAJIVUNIA HATUA UBORESHAJI MIUNDOMBINU KATIKA KAMPASI ZAKE

Afisa Mtendaji Mkuu wa Taasisi ya Uhasibu Tanzania (TIA), Profesa William Pallangyo akizungumza wakati akitoa taarifa kwenye mahafali ya kihistoria baada ya Kampasi ya Singida kutoa kundi la kwanza la Wahitimu wa Shahada ya Uzamili yaliyofanyika Juni 5, 2026 mkoani Singida.

............................

Na Mwandishi Wetu, Singida

TAASISI ya Uhasibu Tanzania (TIA) yajivunia uboreshaji wa miundombinu ya kufundishia na kujifunzia katika kampasi zake.

Hayo yamebainishwa na Afisa Mtendaji Mkuu wa Taasisi hiyo Profesa William Pallangyo wakati akitoa taarifa kwenye mahafali ya kihistoria baada ya Kampasi ya Singida kutoa kundi la kwanza la Wahitimu wa Shahada ya Uzamili.

Wahitimu 548 kutoka Kampasi za Dar es Salaam, Zanzibar, Mtwara, Kigoma na Singida walitunukiwa Shahada za Uzamili katika Mahafali ya 24 yaliyofanyika Juni 5,2026 Manispaa ya Singida.

Akizungumza kwenye mahafali hayo Profesa Pallangyo alisema Taasisi hiyo imeendelea kupiga hatua kubwa katika utekelezaji wa majukumu yake ya msingi sambamba na uboreshaji wa miundombinu ya kufundishia na kujifunzia.

“Mafanikio haya yanatekelezwa kwa ufadhili wa Serikali ya Jamhuri ya Muungano wa Tanzania chini ya Rais Dkt. Samia Suluhu kupitia Mradi wa Mageuzi ya Kiuchumi kwa Vyuo vya Elimu ya Juu (HEET) unaosimamiwa na Wizara ya Elimu, Sayansi na Teknolojia,” alisema.

Pallangyo alitaja miongoni mwa mafanikio hayo yaliyopatikana kuwa ni Ujenzi wa Jengo la Taaluma katika Kampasi ya Singida (shilingi bilioni 13.5) ambao umefikia asilimia 60.

Alitaja maendeleo ya kampasi nyingine kuwa ni ya Mwanza ambako kuna ujenzi wa hosteli mbili za wanafunzi ambazo zimegharimu Shilingi bilioni 7.2 na ujenzi wake umefikia asilimia 95 ya utekelezaji.

Alisema, Pia Taasisi hiyo ina miradi mingine inayotekelezwa ambayo ni ujenzi wa majengo ya taaluma na utawala katika Kampasi ya Kigoma kwa gharama ya Shilingi bilioni 11.08 ambayo yamekamilika kwa asilimia 98.

Ujenzi wa majengo ya taaluma, utawala na mabweni katika Kampasi ya Zanzibar kwa gharama ya Shilingi bilioni 15.9 ujenzi wake unaendelea na umefikia asilimia 30 ya utekelezaji.

Kukamilika kwa miundombinu hiyo, kunaiwezesha Taasisi kuongeza udahili sambamba na ubora wa huduma za mafunzo.

Alisema kwa mwaka 2025/2026 Taasisi imefanya zaidi ya tafiti 13 na kuzalisha machapisho 60 ya kitaaluma katika maeneo mbalimbali.

Alisema Watumishi 24 wanaendelea na masomo ya Shahada ya Uzamivu (PhD) katika vyuo mbalimbali nchini na nje ya nchi.

Mkuu wa Mkoa wa Singida, Halima Dendego ambaye alikuwa mgeni rasmi akifungua program ya mafunzo ya uzamili katika mahafali hayo alisema ni hatua muhimu kwa mkoa wa Singida katika kuendelea kuzalisha wataalamu bobezi wanaohitajika katika sekta mbalimbali za umma na sekta binafsi.